- 016 -
1474 (grudzień) [WrocławRozpoczął się we wtorek po 13. grudnia (dzień św. Łucji).].
Postanowienia Sejmu Śląskiego dotyczące monety.
—Item als awsz wandelunge der moncze folget schaden der lande, dorumb hot seine koniglich gnode gesaczt bey der moncze diese nochgeschriben artickel, die do sullen gehalden werden. Zum ersten das die konigliche moncze noch der ersten awssaczunge am korn an der woge adir schrot und an der czas sal fortan gemonczet und genomet werden obiral in den landen der Nidern Slesien und in den landen bischoffs zu Breslow und den fursten zu Oppiln und des weissen herczogen, herczuge Heinrichs, herczuge Fridrichs, in den furstenthumern Swidnitz Jawer und auch in dem marggraffthum Obir und Nider Lusicz ind in deme furstenthum Sagan und Prebus. Und von dem tage anczuheben, so es zu Breszlow wirt awsgerufft, und von demselben tag dornoch in dreissig tagen, sullen alle obgnanten fursten und lande in ire steten und gebieten auch deszgleichen lossen awszruffen, auch deszgleichen die stete und ein iczlicher lantman in seinem gebiete, und das ein iczlicher sein geltczinsz mit derselben moncze adir noch irer wirde sal pflichtig sein zu beczalen, und denne sullen von stat an alle alde moncze gar mittenander uffhoren und vorslagen sein. Item ap yemandes sulch awsruffen nicht wurde tun adir nicht gebieten zu nehmen, den sal man vor einen ungehorsamen koniglicher maiestat halden und als einen lantfeint durch den gemeynen howptman stroffen, dorczu alle andir fursten lande und stete helfen sullen ane alle widerree. Item wer obir die gesaczte czal mer wirt nehmen vor 1 gulden denn lx groschen, und wirt des obirwunden, der sal durch den fursten howptman foyt adir stat desselben gebietes swerlich gestroffet werden auch bis zum vorfallen aller seynir gutter in die koniglich kammer. Item die fursten noch ynnehalt ir privilegien mogen lossen heller slahen, doch das sie uff glich korn und schrot mit den koniglichen hellern sullen geslagen werden. Und uff das dobey nicht dorffe betriglichkeyt gescheen, sullen alle quatour tempora am Mittwoch der fursten monczmeister zusampne komen mit dem monczmeister und probirer koniglicher maiestat unde mit gemeynir proba eyns iczlichen moncz awss der kowfflewte bewtil probiren, und wo denn falscheit gefunden wirt, sal man sen monczmeister stroffen als recht ist.